Sumatriptan Apofri - lyf við mígrenisköstum

Mígreni

Mígreni er slæmt höfuðverkjakast sem er oft öðrum megin í höfðinu með þungum æðaslætti. Önnur einkenni mígrenis geta meðal annars verið ógleði, uppköst, sjóntruflanir og ljós- og hljóðnæmni. Mígrenikast getur varað í nokkrar klukkustundir og í mjög slæmum tilvikum getur það varað í nokkra daga. Enn er margt á huldu um orsakir mígrenis. Áður var talið að orsök mígrenis væri eingöngu vegna tímabundinnar æðavíkkunar í höfðinu. Nýlegri rannsóknir sýna hins vegar að orsök mígrenis sé einnig oförvun í þrenndartauginni sem er stærsta heilataugin. Það eru ýmsir þættir sem geta valdið mígreni; erfðaþættir, hormónaójafnvægi og umhverfis-og lífsstílsþættir eins og stress og þreyta. Sumir fá fyrirboðaeinkenni eins og sjóntruflanir, máltruflanir og doða í andlit eða hendur. Greining á mígreni er byggð á heilsufarssögu viðkomandi og er mígreni oft flokkað sem mígreni með fyrirboðaeinkennum eða mígreni án fyrirboðaeinkenna.

Sumatriptan Apofri

Sumatriptan Apofri inniheldur virka efnið sumatriptan og er notað sem bráðameðferð við mígreniköstum, með eða án fyrirboðaeinkenna. Sumatriptan var áður aðeins fáanlegt gegn lyfseðli frá lækni og því er kærkomið að Sumatriptan Apofri sé nú á markaði sem lausasölulyf. Lyfið dregur úr víkkun æða í höfðinu og hamlar virkni í þrenndartauginni. Sumatriptan Apofri 50 mg filmuhúðaðar töflur eru fáanlegar í tveggja stykkja pakkningu og er ráðlagur skammtur 1 tafla eins fljótt og hægt er eftir að mígrenikast hefst. Þó er verkun lyfsins óháð því á hvaða stigi kastsins það er tekið.

Lesið vandlega upplýsingar á umbúðum og í fylgiseðli fyrir notkun lyfsins. Leitið til læknis eða lyfjafræðings sé þörf á frekari upplýsingum um áhættu og aukaverkanir. Sjá nánari upplýsingar um lyfið á www.serlyfjaskra.is.

Evolan Pharma AB. EVO230602 - Júní 2023